Իրանի խորհրդարանի նախագահը մեկնել է Բաքու. Ղալիբաֆն անդրադարձել է տարածաշրջանային անվտանգությանը

Իրանի Իսլամական Հանրապետության խորհրդարանի (Մեջլիսի) նախագահ Մոհամմադ Բաղեր Ղալիբաֆը պաշտոնական այցով մեկնել է Ադրբեջանի մայրաքաղաք Բաքու։ Իրանական կողմի հաղորդմամբ՝ այցի նպատակն է մասնակցել Իսլամական համագործակցության կազմակերպության անդամ երկրների խորհրդարանական միության (ԻՀԿ ԽՄ) 20-րդ նիստին։

Մեկնումից առաջ լրագրողների հետ զրույցում Մոհամմադ Բաղեր Ղալիբաֆն ընդգծել է, որ սպասվող խորհրդարանական նիստը հարմար և լավ հնարավորություն է՝ ներկայացնելու և քննարկելու տարածաշրջանային հետպատերազմյան զարգացումները։

Իրանի օրենսդիր մարմնի ղեկավարն իր խոսքում հատուկ անդրադարձ է կատարել տարածաշրջանում արտաքին ուժերի ներկայությանը՝ շեշտելով, որ նրանք ի վիճակի չեն կայունություն ապահովել։

«Ռամադանի պատերազմից հետո պարզ դարձավ, որ օտարերկրյա ուժերը, որոնք այստեղ են եկել հազարավոր կիլոմետրեր հեռվից, չեն կարող անվտանգություն ապահովել և հենց իրենք են հանդիսանում անվտանգության դեմ ուղղված գործոններ։ Պետք է տարածաշրջանում օգտագործենք այս նոր մոտեցումը»,- հայտարարել է Ղալիբաֆը։

ԻՀԿ անդամ երկրների խորհրդարանական միության հոբելյանական՝ 20-րդ նիստի շրջանակներում նախատեսվում են նաև երկկողմ հանդիպումներ և քննարկումներ մասնակից պետությունների պատվիրակությունների ղեկավարների միջև։