Իրանցի պաշտոնյան հայտնել է Հայաստանիև Իրանի միջև մաքսային «կանաչ միջանցքի» գործարկման աշխատանքների վերջնականացման մասին

Իրանական «Radioeqtesad»-ի հետ զրույցում Իրանի մաքսային ծառայության տարանցման վարչության գլխավոր տնօրեն Չենգիզ Խոնարին, անդրադառնալով Հայաստան-Իրան առևտրային հարաբերություններին, հայտնել է երկու երկրների միջև մաքսային «կանաչ միջանցքի» գործարկման աշխատանքների վերջնականացման մասին։ Այս մասին հաղորդում են իրանական լրատվամիջոցները։

Չենգիզ Խոնարին ասել է,  որ ռիսկերի կառավարման և խելացի վերահսկողության վրա հիմնված այս համակարգը թույլ կտա առաջնային ապրանքները, գյուղմթերքն ու սննդամթերքը սահմանով անցկացնել նվազագույն փաստաթղթավորմամբ և առանց ժամանակատար ֆիզիկական զննումների: Խոնարիի փոխանցմամբ՝ ծրագրի հաջող իրականացման համար կողմերը նախապես կփոխանակեն տեղեկատվությունը, ինչը կրճատելու է սահմանին բեռների կանգառի ժամանակը։

Պաշտոնյան հավելել է, որ հայկական կողմի հետ վերջնական առցանց հանդիպումից և մաքսային մարմինների հաստատումից հետո դյուրացված այս ուղին պաշտոնապես կգործարկվի երկու երկրների արտոնյալ տնտեսական օպերատորների համար, ինչը նոր խթան կհանդիսանա երկկողմ առևտրաշրջանառության արագացման համար: 

 Նշելով, որ այս ծրագիրը չի սահմանափակվում միայն Հայաստանով , պաշտոնյան ասել է․ «Եվրասիական տնտեսական միության անդամ պետությունների և այլ երկրների համար կանաչ միջանցքների ստեղծումը նույնպես օրակարգում է, և այս ծրագիրը կիրականացվի փուլերով»։