Քանաքեռ-Զեյթունի նախկին թաղապետը մեղադրվում է համայնքային գույքը շուկայականից բազմակի ցածր արժեքով վաճառելու մեջ

1997-2005 թվականներին Քանաքեռ-Զեյթուն համայնքի թաղապետի պաշտոնը զբաղեցրած Ռ․Ս․-ն մեղադրվում է համայնքային գույքը էականորեն ցածր արժեքով օտարելու մեջ, այս մասին հայտնում է ՀՀ ՆԳՆ ոստիկանությունը։

Ըստ վարույթի նյութերի՝ ՀՀ կառավարության որոշմամբ համայնքին հանձնված՝ Զաքարիա Սարկավագի փողոցի 50 հասցեում գտնվող 16-րդ պոլիկլինիկայի 2370 քմ մակերեսով անավարտ շենքը, որի շուկայական արժեքը կազմել է շուրջ 113,9 մլն դրամ, 2003 թվականին վաճառվել է ընդամենը 9,2 մլն դրամով։

Իրավապահների գնահատմամբ՝ այդ գործողության հետևանքով վնասվել են բնակարանային հաշվառման մեջ գտնվող կարիքավոր ընտանիքների իրավունքները, իսկ Երևանի քաղաքապետարանը զրկվել է բնակարանների մի մասը սոցիալական նպատակներով տնօրինելու հնարավորությունից։

Ռ․Ս․-ի նկատմամբ հարուցվել է հանրային քրեական հետապնդում՝ պաշտոնեական լիազորությունների չարաշահման հոդվածով։ Քրեական վարույթը մեղադրական եզրակացությամբ ուղարկվել է հսկող դատախազին։