Երևանում 2022 թվականին տեղի ունեցած դեպքը վերաորակվել է որպես կանխամտածված սպանություն․ ՔԿ

ՀՀ քննչական կոմիտեն հայտնում է, որ Երևանում քննվող քրեական վարույթի նախաքննության արդյունքում պարզվել է՝ 2022 թվականի հունվարի 21-ին արձանագրված դեպքը, որը սկզբում դիտարկվում էր որպես ինքնասպանություն, իրականում եղել է կանխամտածված սպանություն, այս մասին հայտնում է Քննչական կոմիտեն։

Քննչական տվյալների համաձայն՝ Ի.Ա.-ն, ով բնակվում էր Երևանի Մամիկոնյանց փողոցի 38/3 հասցեում, մահացել է ոչ թե ինքնասպանության հետևանքով, այլ նրա հետ համատեղ բնակվող ամուսիններ Ե.Մ.-ի և Ա.Թ.-ի կողմից կատարված գործողությունների արդյունքում։ ՔԿ-ի գնահատմամբ՝ կողմերը գործել են նախնական համաձայնությամբ։

Քննությամբ պարզվել է, որ վիճաբանության ընթացքում տուժողի նկատմամբ կիրառվել են կյանքի համար վտանգավոր մարմնական վնասվածքներ, որից հետո նա նետվել է բնակարանի խոհանոցի պատուհանից՝ ինչի հետևանքով վրա է հասել մահը։

2026 թվականի մարտի 24-ին դատախազի որոշմամբ Ե.Մ.-ի և Ա.Թ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 104-րդ հոդվածի 2-րդ մասի 7-րդ կետով նախատեսված հանցագործության հատկանիշներով՝ նախնական համաձայնությամբ խմբի կազմում կատարված սպանություն։

Գործը մեղադրական եզրակացությամբ ուղարկվել է հսկող դատախազին։