Կասեցվել է մանկական ճամբարի խոհանոցի գործունեությունը. ՍԱՏՄ

ՀՀ սննդամթերքի անվտանգության տեսչական մարմնի (ՍԱՏՄ) կողմից իրականացված վերահսկողական միջոցառումների արդյունքում խախտումներ են արձանագրվել Կոտայքի մարզի Աղավնաձոր գյուղում գործող «Հեքիաթային կիրճ» մանկական տուրիստական հանգստի կենտրոնի ճամբարում:

Ըստ գերատեսչության հաղորդագրության՝ տեղում պարզվել է, որ խախտվել են սանիտարահիգիենիկ նորմերի պահանջները:

Մասնավորապես հայտնաբերվել են հետևյալ խնդիրները.

• Սննդի կառույցը չի պահվել մաքուր և նորոգ վիճակում.

• Խոհանոցի պատերի որոշ հատվածներ չեն ունեցել հարթ, մաքրվող ու ախտահանվող մակերես.

• Առաստաղը կառուցված չի եղել այնպես, որ կանխարգելվի բորբոսների աճն ու մասնիկների թափվելու հնարավորությունը.

• Խոհանոցի բացվող պատուհանը չի ունեցել միջատապաշտպան ցանց։

ՍԱՏՄ ղեկավարի որոշմամբ՝ ճամբարի խոհանոցի արտադրական գործունեությունը կասեցվել է:

Տնտեսվարողին հանձնարարվել է ձեռնարկել անհրաժեշտ միջոցներ՝ խոհանոցը սահմանված իրավական պահանջներին համապատասխանեցնելու համար: Թերությունների վերացման նպատակով սահմանվել է հստակ ժամկետ: