ԿԸՀ-ն կոչ է արել զերծ մնալ ընտրողների թվի վերաբերյալ շահարկումներից

Կենտրոնական ընտրական հանձնաժողովը հայտնել է, որ Ազգային ժողովի ընտրությունների դեպքում քվեարկությունից մեկ օր առաջ հրապարակվում է միայն ընտրողների ռեգիստրում ընդգրկված քաղաքացիական ընտրողների ընդհանուր թիվը։

ԿԸՀ-ի պարզաբանմամբ՝ առանձին ցուցակներով հաշվառվում են նաև քրեակատարողական հիմնարկներում, ձերբակալվածների պահման վայրերում և զորամասերում գտնվող ընտրողները, ինչպես նաև քվեարկության օրը կազմվող լրացուցիչ ցուցակներում ընդգրկված անձինք։ Այս տվյալները ներառվում են ընտրությունների արդյունքների ամփոփիչ արձանագրություններում։

Հանձնաժողովը նաև հիշեցրել է, որ զորամասերում հաշվառված ընտրողների թվի հրապարակումն օրենքով արգելված է և կոչ արել զերծ մնալ անհիմն շահարկումներից։