Կոբախիձե․ Վրաստանը ստացել է ավելի քան 2 մլրդ խմ ադրբեջանական գազի մատակարարման երաշխիք՝ օպտիմալ գնով

Վրաստանի վարչապետ Իրակլի Կոբախիձեի խոսքով՝ երկրի կառավարությունը հաջողությամբ ավարտել է կարևոր բանակցությունները Ադրբեջանի հետ, որոնց արդյունքում Վրաստանը ստացել է ավելի քան 2 միլիարդ խորանարդ մետր բնական գազի մատակարարման երաշխիք՝ օպտիմալ և ընդունելի գնով, գրում է Business Media-ն։ Այս մասին Կոբախիձեն հայտարարել է խորհրդարանում իր ամենամյա հաշվետու ելույթի ընթացքում։

Նրա խոսքով՝ հաշվետու ժամանակահատվածում գազաֆիկացման ծրագրի շրջանակում գազամատակարարման ցանցին միացվել է ավելի քան 60 բնակավայր, ինչի շնորհիվ բնական գազ է հասանելի դարձել շուրջ 10 000 տնային տնտեսության։

«Գազաֆիկացման գործընթացը շարունակվել է։ Հաշվետու ժամանակահատվածում գազամատակարարման ցանցին միացվել է ավելի քան 60 բնակավայր, ինչը ներառում է մոտ 10 000 բաժանորդ, այսինքն՝ 10 000 տնային տնտեսություն։ Մենք մեր բարեկամ երկրրի՝ Ադրբեջանի հետ անցկացրել ենք շատ կարևոր բանակցություններ գազի մատակարարման հարցով, ինչը սկզբունքային նշանակություն ունի մեր երկրի համար։ Տնտեսության նախարարությունը հաջողությամբ ավարտեց այդ բանակցությունները։ Մենք ապահովել ենք ավելի քան 2 միլիարդ խորանարդ մետր գազի մատակարարման երաշխիք՝ օպտիմալ և ընդունելի գնով։ Ցանկանում եմ շնորհակալություն հայտնել Տնտեսության նախարարությանը և մեր ադրբեջանցի գործընկերներին արդյունավետ բանակցությունների և ձեռք բերված արդյունքի համար։ Սա չափազանց կարևոր է երկրի էներգետիկ անվտանգության ապահովման տեսանկյունից»,-ասել է Կոբախիձեն։