Մաթեմատիկոս Միխայիլ Վերբիցկին ձերբակալվել է Երևանում. ԶԼՄ

ՌԴ-ի կողմից հետախուզվող մաթեմատիկոս Միխայիլ Վերբիցկին ձերբակալվել է Երևանում: Այս մասին հայտնում են ռուսական լրատվամիջոցները:

Լրագրող Օլեգ Կաշինն առաջինն էր, որ հաղորդեց Վերբիցկու ձերբակալության մասին՝ նշելով՝ ձերբակալությունը տեղի է ունեցել «Զվարթնոց» օդանավակայանում՝ Ռուսաստանի խնդրանքով։ Վերջինս այժմ գտնվում է նախնական կալանքի տակ։

56-ամյա Միխայիլ Վերբիցկին ռուս մաթեմատիկոս, հրապարակախոս և մշակութաբան է։ Նա 1995 թվականին ավարտել է Հարվարդի համալսարանը՝ ստանալով մաթեմատիկայի դոկտորի աստիճան:

1998 թվականին Վերբիցկին հիմնել է UR-REALIST անկախ երաժշտական լեյբլը, թողարկվել է ավելի քան 40 ալբոմ:

2015 թվականին մաթեմատիկոսը լքել է Ռուսաստանը՝ քրեական հետապնդման ենթարկվելու մտավախությունների պատճառով, և հետագայում դասավանդել է Ռիո դե Ժանեյրոյի մաթեմատիկայի ազգային ինստիտուտում։ 2025 թվականին գիտնականը ներառվել է «Ռոսֆինմոնիթորինգ»-ի ահաբեկիչների և ծայրահեղականների ցուցակում: Մոսկվայի դատարանը նրան հեռակա կարգով կալանավորելու որոշում է կայացրել՝ «ահաբեկչությունն արդարացնելու» մեղադրանքով։