Մեկ շաբաթում ՆԳՆ օպերատիվ կառավարման կենտրոնում գրանցվել է 750 դեպք, որից 272-ը՝ արտակարգ

ՀՀ ՆԳՆ փրկարար ծառայության 112 օպերատիվ կառավարման կենտրոնում հուլիսի 6-ից 12-ն ընկած ժամանակահատվածում գրանցվել է 750 դեպք, որից 272-ը՝ արտակարգ: Նախորդ շաբաթվա ընթացքում պատահարների հետևանքով տուժել է 121 մարդ, արձանագրվել է 13 զոհ:

Ըստ պաշտոնական վիճակագրության՝ հաշվետու ժամանակահատվածում գրանցվել է հրդեհի 170, ճանապարհատրանսպորտային պատահարի՝ 63, օձերի հայտնաբերման՝ 51 և ինքնասպանության փորձի 11 դեպք։ Արձանագրվել են նաև ջրային հաղորդակցման ուղիներում պատահարների, քարաթափումների, թունավորումների, փլուզումների, տեղատարափ անձրևների, ինչպես նաև ջրահեղձման ու երկրաշարժի առանձին դեպքեր։ Բացի այդ, ստացվել է կենցաղային 188 կանչ և հրդեհի կեղծ ու սպառնալից ընդհանուր 87 ահազանգ։

Եղանակային պայմաններով և այլ գործոններով պայմանավորված՝ գրանցվել է տրանսպորտային միջոցների արգելափակման 53 դեպք: Փրկարար ծառայության աշխատակիցներն օգնություն են ցուցաբերել 97 քաղաքացու և անվտանգ տարածք տեղափոխել ավտոճանապարհներին արգելափակված 55 տրանսպորտային միջոց: