ՄԻՊ-ը քննչական մարմնի տարածած հաղորդագրությունում անձնական տվյալների անհարկի հրապարակումն անընդունելի է համարում

Հայաստանի Մարդու իրավունքների պաշտպանի աշխատակազմում սոցիալական մեդիայի և զանգվածային լրատվության միջոցների մշտադիտարկման արդյունքում արձանագրվել է, որ քրեական վարույթի շրջանակում քննչական մարմնի կողմից օգոստոսի 8-ին տարածված հաղորդագրության մեջ հրապարակվել են վարույթին առնչվող, միևնույն ժամանակ` անձի անձնական և ընտանեկան կյանքին վերաբերելի տվյալներ։ Այս մասին հայտնում են ՄԻՊ աշխատակազմից։

Օմբուդսմենն անընդունելի է համարում քրեական վարույթի վերաբերյալ հանրային հաղորդակցության շրջանակում անձի մասնավոր կյանքին վերաբերող տվյալների անհարկի հանրայնացումը։

«Անհասկանալի է, թե օրենքով սահմանված ի՞նչ իրավաչափ նպատակ է հետապնդում նշված տվյալների հանրայնացումը և ինչու՞ է դա անհրաժեշտ հանրությանը վարույթի վերաբերյալ տեղեկացնելու համար»,- նշված է հայտարարության մեջ։

 

ՄԻՊ գրասենյակից ընդգծում են, որ ցանկացած հանցանք պետք է պատժելի լինի, և իրավապահները պետք է ունենան բազմակողմանի քննություն իրականացնելու պատշաճ հնարավորություն։ Այնուամենայնիվ, ձերբակալությունը, մեղադրյալի կարգավիճակը կամ քրեական հետապնդումը չեն վերացնում անձի մասնավոր կյանքի անձեռնմխելիության իրավունքը։

Մարդու իրավունքների պաշտպանի կողմից արձանագրված հիմնական մտահոգությունները․

Հայտարարությունում նաև նշվում է, որ գործին առնչվող տարբեր ահազանգեր են ստացվել ՄԻՊ թեժ գծին: Մարդու իրավունքների պաշտպանի հանձնարարությամբ արագ արձագանքման այց է իրականացվել քննչական մարմին՝ ձերբակալված անձանց տեսակցելու և նրանց իրավունքների ապահովման վիճակին տեղում ծանոթանալու նպատակով:

Այս պահին իրականացվում են համապատասխան գործողություններ, որոնց ամփոփումից հետո հրապարակման ենթակա տեղեկատվությունը կներկայացվի լրացուցիչ։