«Նորդուզ» սահմանային մաքսակետը ստացել է մասնագիտացված մաքսատան կարգավիճակ. Tasnim

Իրանի «Նորդուզ» սահմանային մաքսակետը սահմանվել է որպես մասնագիտացված մաքսատուն՝ տարբեր տեսակի ապրանքների ներմուծման ձևակերպումների իրականացման համար։ Այս մասին հայտնում է իրանական Tasnim լրատվական գործակալությունը՝ հղում անելով Իրանի մաքսային ծառայության որոշմանը։

Հրապարակված պաշտոնական ծանուցման համաձայն՝ այսուհետ նշված սահմանային կետով բոլոր տեսակի ապրանքների ներմուծումն իրականացվելու է մասնագիտացված կարգով։ Միակ բացառությունը կազմում են բջջային հեռախոսները, որոնց ներմուծումը չի ներառվել այս ընթացակարգում։

«Այս սահմանը, լինելով Իրանի Իսլամական Հանրապետության և Հայաստանի Հանրապետության միջև միակ համատեղ ցամաքային սահմանը, առանցքային դեր է խաղում ապրանքների տարանցման և ԵԱՏՄ անդամ երկրների հետ Իրանի տնտեսական կապերի հարցում»,- նշված է հաղորդագրության մեջ։

Մաքսակետի կարգավիճակի այս փոփոխությունը նպատակ ունի առավել կանոնակարգված և արդյունավետ դարձնել Հայաստանի հետ սահմանով իրականացվող առևտրաշրջանառությունը, որը ռազմավարական նշանակություն ունի Իրան-ԵԱՏՄ տնտեսական հարաբերությունների համատեքստում։