Նոյեմբերյանում թալանել են ավագ էկոպարեկի տունը. գողացել են 12․000 ԱՄՆ դոլար, 1 մլն ՀՀ դրամ և ոսկեղեն

Սեպտեմբերի 4-ին առանձնակի խոշոր չափի բնակարանային գողություն է տեղի ունեցել Տավուշի մարզում։ Ժամը 19:10-ի սահմաններում ՀՀ ՆԳՆ ոստիկանության Նոյեմբերյանի բաժին է դիմել 39-ամյա Աիդա Բ.-ն և հայտնել, որ իր տնից հափշտակություն է կատարվել։

Ֆոտոլրագրող Գագիկ Շամշյանի փոխանցմամբ՝ անհայտ անձը կամ անձինք մուտք են գործել երկհարկանի առանձնատան հյուրասենյակի բաց պատուհանից, տակնուվրա արել սենյակները և առաջին հարկի ննջասենյակի զգեստապահարանից գողացել 12 հազար ԱՄՆ դոլար, 1 միլիոն 100 հազար ՀՀ դրամ և ոսկեղեն։

Տուժողը ՀՀ Էկոպարեկային ծառայության Նոյեմբերյանի տեղամասի ավագ էկոպարեկ է։ Դեպքի առթիվ նախապատրաստվում են նյութեր, հանգամանքները պարզվում են։