Օգոստոսի 12-ին եվրոպական մի շարք քաղաքաներում տեսանելի կլինի արևի ամբողջական խավարումը

Եվրոպական այն քաղաքներում, որտեղ օգոստոսի 12-ին տեսանելի կլինի արևի ամբողջական խավարումը, հյուրանոցների գները կտրուկ աճել են զբոսաշրջիկների հոսքի պատճառով։ Որոշ վայրերում սենյակների գները կրկնապատկվել են,հայտնում են  ռուսական ԶԼՄ-ները։

Հյուրանոցների գներն ամենաշատն են բարձրացել Իսպանիայի Լա Կորունյա քաղաքում։ Համարների միջին գինը հասել է 451 դոլարի, ինչը 135%-ով ավել է մեկ տարի առաջվա հետ համեմատ։ Ռեյկյավիկում խավարման գիշերվա համար սենյակի միջին գինը 793 դոլար է՝ 98%-ով ավելի, քան անցյալ տարի: Բիլբաոյում գներն աճել են 67%-ով, Սանտյագո դե Կոմպոստելայում՝ 34%-ով, իսկ Մալյորկայում՝ 24%-ով՝ հասնելով մոտավորապես 448 դոլարի։

Իսպանիայի իշխանությունները սպասում են, որ մոտ 460,000 օտարերկրյա զբոսաշրջիկ կժամանի երկիր՝ հատուկ խավարման համար: Լույսի խավարման ճանապարհին գտնվող փոքր քաղաքներում և գյուղերում կացարանները ամրագրվել են ամիսներ առաջ։

Զբոսաշրջիկների հոսքը մտահոգություններ է առաջացնում հրդեհների բարձր վտանգի պատճառով: Չորեքշաբթի օրը Իսպանիան սպասում է մոտավորապես 1.5 միլիոնով ավելի մեքենայով ուղևորությունների, քան սովորաբար: Իշխանությունները զգուշացնում են, որ չափազանց չոր եղանակի պատճառով նույնիսկ փոքր կայծը կարող է անտառային հրդեհ առաջացնել, իսկ խցանումները կարող են խոչընդոտել արտակարգ իրավիճակների ծառայությունների աշխատանքը։

Իշխանությունները մտադիր են տեղակայել 35,000 ոստիկան՝ անվտանգությունն ապահովելու համար: Երկրով մեկ արգելվել է չոր բուսականության մոտ կայանելը, ինչպես նաև խորովածներն ու հրավառությունները, իսկ Վալենսիայում փակվել են բնական այգիներն ու գյուղական արշավային արահետները: Իսպանիայի շրջակա միջավայրի նախարարության տվյալներով՝ տարվա սկզբից ի վեր հրդեհները արդեն ոչնչացրել են մոտ 200,000 հեկտար՝ վեց անգամ ավելի, քան կանխատեսվում էր 2025 թվականի այս ժամանակահատվածում։

Առաջիկա խավարումը կլինի այս դարում Եվրոպայից տեսանելի առաջին լրիվ արևային խավարումը: NASA-ն Իսպանիայի հյուսիս-արևմուտքում տեղադրել է չորս հզոր աստղադիտակ և նախատեսում է այն ուղիղ հեռարձակել: Մեծ Բրիտանիայում խավարումը կլինի մասնակի, Լոնդոնում առավելագույն փուլը սպասվում է ժամը 19:12-ին։