Ուշադրություն արտահանողներին. հունիսի 1-ից Ռուսաստան բեռնափոխադրումների կարգը փոխվում է

ԵԱՏՄ անդամ պետություններից, այդ թվում՝ Հայաստանից դեպի Ռուսաստանի Դաշնություն ավտոմոբիլային տրանսպորտով բեռնափոխադրում իրականացնողների համար հունիսի 1-ից ուժի մեջ են մտնում նոր, խստացված կանոններ, հայտնում են Էկոնոմիկայի նախարարությունից։

ՌԴ-ում գործարկվում է Ապրանքների մատակարարման ակնկալման հաստատման ազգային համակարգը՝ СПОТ (Система подтверждения ожидания товаров)։ Չնայած նոր կարգով հիմնական պարտավորությունները կրում է ռուսաստանյան ներմուծող կողմը, փոփոխությունն ուղղակիորեն առնչվում է հայաստանյան արտահանողներին և բեռնափոխադրողներին. առանց սահմանված ընթացակարգերի՝ բեռների մուտքը ՌԴ տարածք կարող է պարզապես արգելվել։

Ի՞նչ է անհրաժեշտ ապահովել մինչև բեռի ուղարկումը

Լրացուցիչ խնդիրներից և սահմանին կանգնելուց խուսափելու համար ՀՀ արտահանողները պետք է հետևողական լինեն, որպեսզի ռուսաստանյան գործընկերը կամ էլեկտրոնային առևտրի հարթակի գործակալը ժամանակին կատարի հետևյալ քայլերը.

• Փաստաթղթի ձևավորում. Մինչև բեռը ճանապարհելը պետք է ձևավորված լինի մատակարարման ակնկալման հաստատման էլեկտրոնային փաստաթուղթը՝ ДОПП (Документ о предстоящей поставке товаров)։
• Հստակ ժամկետներ. ДОПП-ը պետք է ներկայացվի ՌԴ հարկային մարմիններին՝ հաշվի առնելով սահմանված վերջնաժամկետները.
• Սահմանի հատումից ոչ ուշ, քան 48 ժամ առաջ, եթե վճարվում է ներմուծման ԱԱՀ-ի ապահովման վճար։
• Սահմանի հատումից ոչ ուշ, քան 4 ժամ առաջ, եթե նման վճար չի իրականացվում։
• QR-կոդի առկայություն. Փաստաթղթի հիման վրա ձևավորված համապատասխան QR-կոդը ռուսաստանյան կողմը պետք է փոխանցի հայաստանյան արտահանողին, իսկ վերջինս էլ՝ վարորդին։ Փոխադրողը պետք է ունենա QR-կոդը մինչև ՌԴ սահմանին մոտենալը։
• Տվյալների համապատասխանություն. Բեռն ուղեկցող փաստաթղթերի տվյալները պետք է բացարձակ ճշգրտությամբ համընկնեն ДОПП-ում լրացված տեղեկությունների հետ։

Ի՞նչ տեղեկատվություն է պետք փոխանցել ռուսաստանյան գործընկերոջը

Համակարգում տվյալների ժամանակին և անխափան մուտքագրման համար հայկական կողմը պետք է ռուսաստանյան գործընկերոջը նախապես տրամադրի հետևյալ տվյալները.

1. Ապրանքի ճշգրիտ անվանումը, քանակը և արժեքը,
2. ԱՏԳ ԱԱ (ТН ВЭД) ծածկագիրը,
3. Հաշիվ-ապրանքագրի (invoice), պայմանագրի և ուղեկցող այլ փաստաթղթերի տվյալները,
4. Փոխադրողի և տրանսպորտային միջոցի վերաբերյալ մանրամասն տեղեկատվություն,
5. ՌԴ տարածք մուտք գործելու նախատեսվող հստակ ամսաթիվը։

Էկոնոմիկայի նախարարության հորդորը. ՀՀ էկոնոմիկայի նախարարությունը հորդորում է բոլոր արտահանողներին և լոգիստիկ ընկերություններին՝ ֆինանսական կորուստներից, լրացուցիչ ծախսերից և սահմանային ուշացումներից խուսափելու համար, արդեն իսկ նախապատրաստվել փոփոխություններին և նոր ընթացակարգերը մանրամասն քննարկել ռուսաստանյան գործընկերների հետ։

Նոր համակարգի և դրա կանոնակարգերի վերաբերյալ պաշտոնական մանրամասներին կարելի է ծանոթանալ ՌԴ դաշնային հարկային ծառայության կայքում՝ https://www.nalog.gov.ru/rn77/related_activities/spot/։