Փամբակ գետում հայտնաբերվել է երկու օր որոնվող տղամարդու դին. ՆԳՆ ՓԾ

Լոռու մարզում հունիսի 27-ից մեկնարկած որոնողական աշխատանքներն ավարտվել են։ Փամբակ գետից դուրս է բերվել անհետացած տղամարդու դին։ Տեղեկությունը հայտնում է ՀՀ Ներքին գործերի նախարարության Փրկարար ծառայությունը։

Ըստ պաշտոնական հաղորդագրության՝ այսօր՝ հունիսի 29-ին, ժամը 09։40-ի սահմաններում, հրշեջ-փրկարարները դին հայտնաբերել են Փամբակ գետում՝ Դսեղ բնակավայրի խաչմերուկի մոտակայքում։

Հիշեցնենք, որ ողբերգական պատահարի մասին առաջին ահազանգերը Լոռու մարզային օպերատիվ կառավարման կենտրոն ստացվել էին հունիսի 27-ի առավոտյան։ Ժամը 10։56-ին հաղորդվել էր, որ Վանաձոր-Ալավերդի ավտոճանապարհի թունելի մոտակայքում՝ գետի մեջ, դի է նկատվում։

Որոշ ժամանակ անց՝ ժամը 12։03-ին, ստացվել էր ևս մեկ ահազանգ այն մասին, որ նույն գետում ավտոմեքենա կա, որը դուրս բերելու համար անհրաժեշտ է եղել փրկարարների օգնությունը։