Փաստերի դեմ քարոզչություն․ Ալիևը կրկին հնչեցնում է հակահայկական մեղադրանքներ

Ադրբեջանի նախագահ Իլհամ Ալիևը ելույթ է ունեցել 2026 թվականի Իսլամական զարգացման բանկի խմբի տարեկան ժողովների բացման արարողության ժամանակ  և ասել, որ Ադրբեջանը չի մոռանա պատերազմի ընթացքում տեղի ունեցած իրադարձությունները՝ նշելով քաղաքների ավերածությունները և մզկիթների վնասումը, հայտնում են ադրբեջանական լրատվամիջոցները։

«Մենք երբեք չենք մոռանա այն, ինչ հայ օկուպանտները արեցին մեր ժողովրդի և մեր քաղաքների հետ, չենք մոռանա 65 մզկիթների ավերման մասին», — ասել է Ալիևը։

Ալիևը շարունակում է հակահայկական հայտարարություններ անել՝ դրանք հիմնավորելով կասկածելի և իր քարոզչամեքենայի կողմից շրջանառվող «փաստերով»՝ միաժամանակ անտեսելով 2020 թվականի 44-օրյա պատերազմի հետևանքով Լեռնային Ղարաբաղի՝ Ադրբեջանի վերահսկողության տակ անցնելուց հետո հայկական քրիստոնեական մշակութային ժառանգության ոչնչացման և վնասման վերաբերյալ բազմիցս հրապարակված փաստերը։ Վերջին տարիներին տարբեր աղբյուրներ և հրապարակումներ փաստում են եկեղեցիների, խաչքարերի, պատմամշակութային հուշարձանների և գերեզմանոցների վնասման կամ ոչնչացման դեպքեր։

Միաժամանակ չի բացառվում, որ նման հայտարարություններով Ադրբեջանի ղեկավարությունը փորձում է շեղել ուշադրությունը այդ փաստերից և միջազգային հարթակում առաջ մղել սեփական քաղաքական օրակարգը՝ մեղադրանքներն ուղղելով հայկական կողմին։