Փրկարարներն Հրազդանում օգնել են քաղաքացիներին շենքից դուրս գալ և ջրահեռացման աշխատանքներ են իրականացրել

Հրազդան քաղաքի Միկրոշրջան թաղամասի շենքերից մեկի հարակից տարածքն ամբողջությամբ ողողվել է ջրով, ինչի հետևանքով բնակիչները հայտնվել են շրջափակման մեջ և չեն կարողացել դուրս գալ շենքից, հայտնում են ՀՀ ՆԳՆ փրկարար ծառայությունից։

Գերատեսչության փոխանցմամբ՝ դեպքի վերաբերյալ ահազանգը «112» օպերատիվ կառավարման կենտրոնում ստացվել է այսօր՝ մայիսի 27-ին, ժամը 10:15-ին:

Ահազանգով դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի օպերատիվ խումբն ու մեկ մարտական հաշվարկ:

Փրկարարների միջամտությամբ և օգնությամբ քաղաքացիներն ապահով դուրս են բերվել շենքից: Դրանից հետո փրկարարական ուժերը տեղական ինքնակառավարման մարմինների (ՏԻՄ) աշխատակիցների հետ համատեղ իրականացրել են տարածքի ջրահեռացման աշխատանքներ։