ՌԴ ԱԽ-ն հայտարարել է, թե ԵՄ-ին անդամակցելով՝ «Հայաստանը կկորցնի իր ՀՆԱ-ի 23 տոկոսը»

Ամենահամեստ գնահատականներով՝ Հայաստանը կկորցնի իր ՀՆԱ-ի մոտավորապես 23%-ը, եթե միանա Եվրամիությանը։ Այս մասին հայտարարել է ՌԴ Անվտանգության խորհրդի քարտուղարի տեղակալ Ալեքսեյ Շևցովը, գրում է ՌԻԱ Նովոստին։

 «Ընդհանուր առմամբ, ԵՄ-ին անդամակցությունը, ամենահամեստ գնահատականներով, Հայաստանին կարժենա ՀՆԱ-ի մոտավորապես 23%-ը, մինչդեռ աշխատաշուկայի զանգվածային կրճատումը 10,5 տոկոսային կետով և գնաճի 22,6 տոկոսային կետով ավելացումը կհանգեցնեն կենսամակարդակի զգալի անկման: Ներքին սպառումը կնվազի ավելի քան 20%-ով՝ ներկայիս մակարդակից»,- հայտարարել է Շևցովը։

 Նրա խոսքով՝ ակնկալվում է էներգակիրների, այդ թվում՝ բնական գազի գների հետագա աճ: ՀՀ վարչապետը բազմիցս նշել է՝  Երևանն ընդունում է ԵՏՄ-ին և ԵՄ-ին անդամակցության անհամատեղելիությունը, սակայն գործընթացը դեռևս չի հասել այն փուլին, երբ պետք է վերջնական որոշում կայացվի։

«Բայց քանի դեռ Եվրոպական միության հետ մոտարկման, ԵՄ անդամակցության չափանիշներին համապատասխանելուն ուղղված բարեփոխումները համատեղելի են Եվրասիական տնտեսական միության անդամ լինելու հետ, Հայաստանի Հանրապետությունը կշարունակի մնալ ԵՏՄ անդամ և կզարգացնի առևտրատնտեսական հարաբերությունները նրա անդամ երկրների հետ»,- նշել է ՀՀ վարչապետը՝ ներկայացնելով «Քաղաքացիական պայմանագիր» կուսակցության նախընտրական ծրագիրը։