Սաուդյան Արաբիան չեղարկել է ապրիլին նախատեսված միջազգային տնտեսական հանդիպումը

 ԴՈՀԱ, 24 մարտի - Սաուդյան Արաբիայի Էկոնոմիկայի և պլանավորման նախարարությունը, Համաշխարհային տնտեսական ֆորումի հետ համաձայնեցմամբ, անորոշ ժամանակով հետաձգել է ապրիլի 22-23-ին Ջիդդայում նախատեսված համագործակցության և տնտեսական աճի հարցերին նվիրված միջազգային հանդիպումը։ Որոշումը պայմանավորված է Մերձավոր Արևելքում իրավիճակի սրմամբ։ Այս մասին երեքշաբթի հաղորդել է Սաուդյան պետական SPA գործակալությունը՝ հղում անելով նախարարության հայտարարությանը, հայտնում է "РИА Новости"-ն։

Հունվարին Սաուդյան Արաբիայի արտաքին գործերի նախարար Ֆեյսալ բեն Ֆարհանը Դավոսի համաժողովում հայտարարել էր, որ թագավորությունը մտադիր է ապրիլին Ջիդդայում կազմակերպել միջազգային տնտեսական հանդիպում։

Գերատեսչությունից նշել են, որ Համաշխարհային տնտեսական ֆորումը, նախարարության հետ համակարգմամբ, հայտարարել է ապրիլի 22-23-ին Ջիդդայում նախատեսված հանդիպման հետաձգման մասին։

Նախարարությունը պարզաբանել է, որ որոշումն ընդունվել է ֆորումի կազմակերպիչների խնդրանքով՝ տարածաշրջանում ընթացիկ զարգացումների ֆոնին, որպեսզի միջոցառումն անցկացվի առավել նպաստավոր ժամանակահատվածում և ապահովվի ակնկալվող արդյունքը։ Նոր ժամկետի մասին կազմակերպիչները կհայտարարեն ավելի ուշ։