ՍԱՏՄ-ն պաշտոնական տեղեկատվություն չի ստացել «Ջերմուկ» ապրանքանիշի որոշ խմբաքանակների արգելափակման մասին

ՀՀ սննդամթերքի անվտանգության տեսչական մարմինը հայտնում է, որ ռուսական և հայկական մամուլում տարածված տեղեկությունների վերաբերյալ՝ «Ջերմուկ» ապրանքանիշի որոշ խմբաքանակների հնարավոր արգելափակման մասին,  ՌԴ համապատասխան պատկան մարմիններից՝ «Ռոսպոտրեբնադզոր»-ից կամ «Ռոսսելխոզնադզորից» պաշտոնական որևէ տեղեկություն՝ գրություն, խնդրո առարկայի վերաբերյալ առայժմ չի ստացել:

ՍԱՏՄ-ից հայտնում են, որ ձեռնարկվում են պարզաբանման աշխատանքներ, և անհրաժեշտ տեղեկատվությունը ստանալուց հետո կհրապարակվեն համապատասխան արդյունքները։

 Հիշեցնենք, որ համաձայն ռուսական և հայկական մամուլում տարածված տեղեկությունների՝ Ռուսական պիտակավորման  ​​«Честный знак» համակարգը դադարեցրել է Հայաստանի «Ջերմուկ» հանքային ջրի մի խմբաքանակի վաճառքն ինչպես օֆլայն, այնպես էլ օնլայն խանութներում։

Ինչպես հայտնել է Ռուսաստանի առաջադեմ տեխնոլոգիաների զարգացման կենտրոնի  գլխավոր տնօրենի տեղակալ Ռևազ Յուսուպովը, շրջանառության մեջ գտնվել է 338 հազար շիշ, որոնք այժմ արգելափակված են մինչև ստուգման ավարտը։

Շրջանառության դադարեցման պատճառ է դարձել Ռոսպոտրեբնադզորի նամակը, որտեղ գերատեսչությունը նշել է «Ռուսաստանի քաղաքացիների կյանքի և առողջության հնարավոր վնասը կանխելու համար անհապաղ միջոցներ ձեռնարկելու անհրաժեշտությունը»։ Արգելափակման պատճառ են նշվել «պարտադիր պահանջների խախտումները»։

 Նշվում է նաև, որ արգելքի տակ են հայտնվել 2026 թվականի փետրվարի 17-ին և մարտի 5-ին արտադրված արտադրանքները։ Ինչպես նշել է Յուսուպովը, «մինչև ստուգման ավարտը այն չի հասնի սպառողներին»։

Պիտակավորման համակարգն արդեն դադարեցրել էր «Ջերմուկ»-ի 2.5 միլիոն շշի վաճառքը 2024 թվականին՝ Հյուսիսային Օսիայի բնակչի թունավորումից հետո։ Այն ժամանակ շշում հանքային ջրի փոխարեն հայտնաբերվել էր քացախաթթու։