Սեմերուի նոր ժայթքում երկուշաբթի առավոտյան․ ժայթքումը հասել է 1 կիլոմետր բարձրության

Ինդոնեզիայի Արևելյան Ջավայում գտնվող Սեմերու հրաբուխը ապրիլի 13-ին կրկին ակտիվացել է՝ մի քանի ժամվա ընթացքում գրանցելով մի շարք ժայթքումներ, հայտնում է ինդոնեզական VOI  լրատվամջոցը։

Ըստ դիտարկումների՝ մոխրի սյունը եղել է սպիտակից մինչև մոխրագույն՝ տարածվելով արևմտյան և հյուսիս-արևմտյան ուղղություններով։

Ընդհանուր առմամբ, նույն օրը գրանցվել է վեց ժայթքում՝ տարբեր ինտենսիվությամբ։ Դրանք սկսվել են վաղ առավոտյան և հաջորդել միմյանց՝ հասնելով մինչև 1 կիլոմետր բարձրության։

Մասնագետների տվյալներով՝ հրաբուխը գտնվում է ակտիվության III մակարդակում (զգուշացման աստիճան)։ Ինդոնեզիայի համապատասխան մարմինները կոչ են արել բնակիչներին չմոտենալ վտանգավոր գոտիներին, մասնավորապես՝ խուսափել գագաթից մինչև 5 կմ շառավղով տարածքից և գետերի երկայնքով հատվածներից, որտեղ հնարավոր են լավայի և տաք գազային ամպերի հոսքեր։

Իշխանությունները նաև զգուշացրել են լավայի և այլ վտանգավոր երևույթների հավանականության մասին՝ կոչ անելով բնակչությանը պահպանել անվտանգության կանոնները։