Շաքիի ջրվեժի ջրային հոսքի նվազման պատճառ է հայտնաբերվել. արձանագրվել է խախտում ՓՀԷԿ-ում

 ՀՀ բնապահպանության և ընդերքի տեսչական մարմնի ստուգմամբ պարզվել է, որ Սյունիքի մարզի Շաքի գյուղում գործող «ՀԱԿՈԲՋԱՆՅԱՆԻ ԵՎ ԳԱԼՍՏՅԱՆԻ ՀԷԿ» ՍՊԸ-ին պատկանող «Շաքի» փոքր ՀԷԿ-ում արձանագրվել են ջրօգտագործման թույլտվության պահանջների խախտումներ։

Ստուգումը իրականացվել է Շաքիի ջրվեժի ջրային հոսքի նվազման վերաբերյալ ստացված ահազանգի հիման վրա։

Տեսչական մարմնի տվյալներով՝ ընկերությունը գերազանցել է սահմանված ջրօգտագործման չափաքանակները՝ Շաքի գետից կատարելով 13,538,687 խմ ավել ջրառ, ինչպես նաև խախտել է ըստ ամիսների սահմանված ջրառի ծավալները, ջրօգտագործման ժամանակահատվածը և ռեժիմը։

Կատարված հաշվարկի համաձայն՝ ջրային ռեսուրսների վրա հասցված ազդեցությունը գնահատվել է 27,077,374 ՀՀ դրամ։

Ընկերության տնօրենը կենթարկվի վարչական պատասխանատվության։