Շիրակի և Տավուշի մարզերում ուսումնասիրվել են CAFSEP ծրագրի հնարավորությունները

ՀՀ էկոնոմիկայի նախարարության կողմից ԱԶԲ աջակցությամբ իրականացվող «Կլիմայական փոփոխություններին հարմարեցվող պարենային անվտանգության բարձրացման» (CAFSEP) ծրագրի շրջանակում հունիսի 18-19-ին աշխատանքային այցեր են կատարվել Շիրակի և Տավուշի մարզերի մի շարք բնակավայրեր, այս մասին հայտնում է ՀՀ Էկոնոմիկայի նախարարությունը։

Այցերին մասնակցել են ԱԶԲ ներկայացուցիչները, ծրագրի իրականացման թիմը, ինչպես նաև խորհրդատվական ընկերությունների կոնսորցիումի անդամները։ Նրանք ուսումնասիրել են ծրագրի շահառու տնային տնտեսություններին նախատեսվող օժանդակության հնարավորությունները, այդ թվում՝ տնկիների տրամադրումը։

Միաժամանակ դիտարկվել են գյուղատնտեսական լոգիստիկ հանգույցների հնարավոր տեղանքներ՝ գնահատելով դրանց ենթակառուցվածքները, հասանելիությունը, շուկաների հետ կապը, ինչպես նաև բնապահպանական և սոցիալական գործոնները։

Ծրագիրը նպատակ ունի խթանել գյուղատնտեսական արժեշղթաների զարգացումը, նվազեցնել հետբերքահավաքային կորուստները և ամրապնդել համայնքների կլիմայական ու տնտեսական դիմակայունությունը։