Շրջանառության մեջ է դրվել ճարտարապետ Ջիմ Թորոսյանի 100-ամյակին նվիրված գեղաթերթիկ

Հունիսի 26-ին շրջանառության մեջ է դրվել մեկ նամականիշով գեղաթերթիկ` նվիրված «Մեծանուն հայեր. Ջիմ Թորոսյանի ծննդյան 100-ամյակ» թեմային: Այդ մասին հայտնում է ՀՀ բարձր տեխնոլոգիական արդյունաբերության նախարարությունը:

Գեղաթերթիկի հանդիսավոր մարումն իրականացրել են ԲՏԱ նախարարի տեղակալ Գևորգ Մելիքսեթյանը, ԿԳՄՍ նախարարի տեղակալ Դանիել Դանիելյանը, «Հայփոստ» ընկերության գլխավոր գործադիր տնօրեն Շուշան Ալեքսանյանը, Ջիմ Թորոսյանի դուստրը՝ Նունե Թորոսյանը, և Հայաստանի ճարտարապետների պալատի նախագահ Ալեքսանդր Բադալյանը։

Նամականիշի վրա պատկերված է ԽՍՀՄ ժողովրդական ճարտարապետ Ջիմ Թորոսյանը (1926-2014 թթ.): Գեղաթերթիկի ձևավորման մեջ ներառված են հեղինակի հայտնի աշխատանքները, այդ թվում՝ «Կասկադ» համալիրի մի հատվածը (ճարտարապետներ՝ Ջ. Թորոսյան, Ս. Գուրզադյան, Ա. Մխիթարյան), ինչպես նաև Մայր Աթոռ Սուրբ Էջմիածնի մուտքն ու բացօթյա խորանը (ճարտարապետներ՝ Ջ. Թորոսյան, Ռ. Ջուլհակյան):

Թողարկման վրա հայերեն և անգլերեն լեզուներով առկա են «ՋԻՄ ԹՈՐՈՍՅԱՆ», «100-ԱՄՅԱԿ» և «ՀԱՅ ՃԱՐՏԱՐԱՊԵՏ» գրառումները։ Ճարտարապետի լուսանկարը տրամադրել է «Արմենպրես» լրատվական գործակալությունը: