Ստամբուլում հանդիպել են Վրաստանի և Ադրբեջանի արտգործնախարարները. ուշադրության կենտրոնում է եղել «Միջին միջանցքը»

Թուրքիայում ընթացող տարածաշրջանային զարգացումների համատեքստում, Ստամբուլում առանձնազրույց են ունեցել Վրաստանի արտաքին գործերի նախարար Մակա Բոչորիշվիլին և Ադրբեջանի արտգործնախարար Ջեյհուն Բայրամովը, հայտնում է Վրաստանի ԱԳՆ-ն:

Ըստ Վրաստանի արտաքին քաղաքական գերատեսչության պաշտոնական հաղորդագրության՝ հանդիպման առանցքում եղել են Վրաստան-Ադրբեջան ռազմավարական գործընկերության հարցերն ու երկկողմ օրակարգը։ Նախարարներն ընդգծել են քաղաքական երկխոսության բարձր մակարդակը, ինչպես նաև առևտրատնտեսական և ներդրումային ոլորտներում արձանագրված առաջընթացն ու ապագա համագործակցության հեռանկարները։

Առանձնահատուկ շեշտադրում է արվել տարածաշրջանային խոշոր ենթակառուցվածքային և էներգետիկ նախագծերին.

«Հատուկ ուշադրություն է դարձվել տարածաշրջանային կարևոր ենթակառուցվածքային և էներգետիկ նախագծերի իրականացման գործում համատեղ ջանքերին, այդ թվում՝ «Միջին միջանցքի» (Middle Corridor) զարգացման գործում ռազմավարական նախագծերի հաջող իրականացման կարևորությանը»,- նշված է պաշտոնական հաղորդագրության մեջ։

Կողմերը վերահաստատել են իրենց պատրաստակամությունը՝ շարունակելու ակտիվ փոխգործակցությունը՝ ի նպաստ տարածաշրջանային կայունության և տնտեսական ինտեգրման խորացման։