Թուրքիայում վերանորոգում են Հայաստանի հետ սահմանամերձ երկաթուղային գիծը. Աքյաքայի շրջանապետն այցելել է շինհրապարակ

Թուրքիայի Աքյաքա (Akyaka) շրջանի ղեկավար Ի․ Դեմիրթաշն այցելել է Հայաստանի հետ սահմանամերձ գոտի, որտեղ տեղում ծանոթացել և հետևել է երկաթուղու վերանորոգման և արդիականացման աշխատանքների ընթացքին: Այս մասին հայտնում են թուրքայկան ԶԼՄ–ները։

Շինհրապարակում տեխնիկական խմբերը շրջանապետին մանրամասն տեղեկություններ են փոխանցել ընթացիկ վիճակի, իրականացվող տեխնիկական գործընթացների և նախատեսված ժամանակացույցի վերաբերյալ:

Այցի ընթացքում տեղում գնահատվել են երկաթուղային գիծն ավելի անվտանգ դարձնելուն ուղղված աշխատանքները, մասնավորապես՝

• Ռելսերի թարմացումը,

• Ենթակառուցվածքների ամրապնդումը,

• Ընթացիկ սպասարկման և վերանորոգման տեխնիկական փուլերը:

Թուրքական լրատվամիջոցների հաղորդմամբ՝ Հայաստանի սահմանի երկայնքով անցնող այս ռազմավարական երկաթգծի արդիականացումը նպատակ ունի բարձրացնել տրանսպորտային անվտանգությունը, բարելավել ենթակառուցվածքների թողունակությունը և ապագայում զգալի ներդրում ունենալ երկաթուղային տրանսպորտի ոլորտում։

Այցելությունն ավարտվել է շինհրապարակում տեխնիկական մասնագետների հետ կայացած ամփոփիչ քննարկմամբ: Ընդգծվել է, որ վերանորոգման ավարտից հետո գիծը կդառնա առավել անվտանգ, արդյունավետ և պատրաստ՝ առաջիկա տարիներին անխափան ծառայելու համար։