Վագրը դուրս է եկել կառավարումից ու հայտնվել մարդկանցով լի դահլիճում

Ռուսաստանի Դոնի Ռոստով քաղաքում գործող Շապիտո կրկեսում արտառոց դեպք է տեղի ունեցել, վագրը դուրս եկել է վարժեցնողի կառավարումից ու մտել դահլիճ: Արտակարգ միջադեպից համացանցում տեսանյութեր են ակտիվորեն տարածվում, որում երևում է ողջ եղելությունը։

Միջադեպը տեղի է ունեցել ապրիլի 19-ին՝ Նագիբինի պողոտայում գտնվող կրկեսում։ Նախնական տվյալներով՝ վագրերից մեկը, վախենալով ընկած պաշտպանիչ ցանցից, ցատկել է արգելապատնեշի վրայով և հայտնվել հանդիսատեսի հատվածում։ Այցելուները օպերատիվ կերպով տարհանվել են։

Կրկեսի տնօրինության փոխանցմամբ՝ կենդանուն հաջողվել է արագ վերադարձնել՝ նրան օձիքից քաշելով։ Տուժածներ չկան, սակայն միջադեպը խուճապ է առաջացրել հանդիսատեսի շրջանում։