«Վանաձոր» ՔԿՀ-ում կանխվել է թմրամիջոցների նմանվող զանգվածների փոխանցման հերթական փորձը (վիդեո)

Մայիսի 26-ին՝ ժամը 13։05-ի սահմաններում, ՀՀ ԱՆ «Վանաձոր» քրեակատարողական հիմնարկի դատապարտյալի մոտ կարճատև տեսակցության եկած քաղաքացին դրսևորել է կասկածելի վարքագիծ, հայտնում են ՔԿ-ից: Համապատասխան ստորաբաժանումների ծառայողները տեսահսկման համակարգի միջոցով հետևել և նկատել են, որ քաղաքացին  փորձում է իր մարմի միջից հանել և ինչ-որ առարկա փոխանցել դատապարտյալին։

Ծառայողները, անմիջապես մտնելով տեսակցության սենյակ, նկատել են հատակին ընկած կասկածելի փաթեթ։ Փաթեթի ուսումնասիրությամբ պարզվել է՝ դրանում առկա են ևս 8 առանձնացված փաթեթներ՝ թմրամիջոցների նմանվող 29,26 գրամ դեղնականաչավուն զանգվածով, 6,80 գրամ սպիտակ, փոշենման զանգվածով և 2,50 գրամ դեղնավուն, խեժանման զանգվածով։

Քաղաքացին ձերբակալվել է Քրեակատարողական ծառայության կենտրոնական մարմնի օպերատիվ վարչության «Վանաձոր» տարածքային բաժնի ծառայողների կողմից և ներկայացվել ՀՀ ՔԿ Լոռու մարզային քննչական վարչություն։