Վանդալիզմ Վրաստանում․ հայկական եկեղեցու սրբապատկերները հայտնվել են աղբամանների մոտ

 Վրաստանի Մարդա գյուղում (Սամցխե–Ջավախեթի մարզ, Ախալցխայի մունիցիպալիտետ) գտնվող եկեղեցուց դուրս են բերել Հայ Առաքելական և ուղղափառ եկեղեցիների սրբապատկերներն ու այլ եկեղեցական իրեր և նետել աղբամանների մոտ։ Այս մասին վրացական լրատվամիջոցներին հայտնել է Հայ Առաքելական եկեղեցու հոգևորական Տեր Հակոբ Սահակյանը։

Վերջինիս խոսքով՝ դեպքը, հավանաբար, տեղի է ունեցել նախորդ գիշերը։ Նա նշել է, որ տեղի բնակիչները սրբապատկերները հետ են վերադարձրել եկեղեցի։

Առայժմ հայտնի չէ, թե ինչ նպատակով են եկեղեցուց դուրս բերվել սրբապատկերներն ու եկեղեցական իրերը։ Եկեղեցու հարևանությամբ բնակվող քաղաքացիներից մեկը լրատվամիջոցին հայտնել է, որ որևէ կասկածելի բան չի նկատել և տեղի ունեցածի մասին տեղեկություն չունի։

Դեպքի վայրում աշխատել է նաև ոստիկանությունը։ Վրաստանի ՆԳՆ-ից դեռևս չեն հայտնել՝ հարուցվե՞լ է արդյոք քրեական գործ և ինչ հոդվածով է ընթանում քննությունը։ Լրատվամիջոցը նաև փորձում է պարզել՝ արդյոք տարածքում եղել են տեսախցիկներ, որոնք կարող էին արձանագրել միջադեպը։

Վրացական լրատվամիջոցը նշում է, որ եկեղեցին վիճելի կարգավիճակ ունի։ Հայ Առաքելական եկեղեցու հետևորդները պնդում են, որ այն պատմականորեն պատկանում է հայկական համայնքին, նույնը պնդում է նաև ուղղափառ կողմը։ Այդ պատճառով տասնամյակներ շարունակ եկեղեցում որևէ կրոնական համայնք պատարագ չի մատուցում։