Վրաստանն առանձնահատուկ հարաբերություններ ունի հարևան երեք երկրների՝ Ադրբեջանի, Հայաստանի և Թուրքիայի հետ․ Կոբախիձե

 Վրաստանն առանձնահատուկ հարաբերություններ ունի հարևան երեք երկրների՝ Ադրբեջանի, Հայաստանի և Թուրքիայի հետ, և այդ հարաբերություններն էլ ավելի են խորանում։ Այս մասին «Imedi» հեռուստաընկերության եթերում ասել է Վրաստանի վարչապետ Իրակլի Կոբախիձեն։

Կոբախիձեն նշել է, որ Վրաստանում կապակցվածության զարգացման ուղղությամբ խոշոր ենթակառուցվածքային ծրագրեր են իրականացվում․ «Մեր ծրագրի համաձայն՝ մինչև 2031 թվականը գործնականում բոլոր արագընթաց ավտոմայրուղիներն արդեն կառուցված կլինեն՝ բացառությամբ մեկ կոնկրետ հատվածի։ Բացի դրանից՝ ակտիվորեն շարունակվում են երկաթուղու արդիականացումն ու դրա կարողությունների հզորացումը։ Մենք կառուցում ենք Անակլիայի նավահանգիստը, և այստեղ ևս աշխատանքներն ակտիվորեն ընթանում են։ Զարգանում է նաև օդանավակայանների ենթակառուցվածքը․ խոսքը մեր երկրում գործող երեք միջազգային օդանավակայանների մասին է»։