Զելենսկին պատրաստ է Թուրքիայում հանդիպել Պուտինի հետ. Ուկրաինայի արտգործնախարար

Ուկրաինայի արտաքին գործերի նախարար Անդրեյ Սիբիհան Անթալիայի դիվանագիտական ֆորումում հայտարարել է, որ Կիևը պատրաստ է բարձր մակարդակի բանակցությունների՝ այդ թվում Թուրքիայի տարածքում, նախագահներ Ռեջեփ Թայիփ Էրդողանի և Դոնալդ Թրամփի մասնակցությամբ, հայտնում է թուրքական «TRT»-ն։

Նրա խոսքով՝ Ուկրաինան ձգտում է հնարավորինս արագ ավարտել պատերազմը և օգտագործում է բոլոր հնարավորությունները՝ այդ նպատակին հասնելու համար։

Սիբիհան ընդգծել է Թուրքիայի կարևոր դերը՝ հիշեցնելով, որ Անկարան միջնորդել է 2022 թվականի Ստամբուլի բանակցություններին, աջակցել հացահատիկային համաձայնագրին, ինչպես նաև ներգրավված է եղել ռազմագերիների փոխանակման և Սև ծովի ականազերծման գործընթացներում։

Կիևը նաև ակնկալում է Թուրքիայի աջակցությունը՝ առաջնորդների մակարդակով հանդիպման կազմակերպման հարցում։